James 5
Di hagailoo hagalliga gi digau maluagina
1Goodou ala e maluagina, hagalongo mai dolomeenei! Goodou gi tangitangi ge gi manawa gee, i di haadanga balua la ga dae adu gi goodou. 2Godou maluagina la ga mooho, godou gahu la ga gai go hiingodo. a 3Godou goolo mono silber la ga tomo. Nia tomo aanei la di haga modongoohia e hai baahi adu gi goodou, gei e gai godou huaidina gadoo be di ahi. Goodou ne benebene godou maluagina i nia laangi hagaodi aanei. 4Goodou digi huina nia daangada ala nogo ngalua i lodo godou hadagee. Goodou hagalongo malaa gi nadau de donu. Nia lee o digau e hagabudu godou hua laagau la gu hagalongo ginai a God, go Tagi Aamua. b 5Godou mouli i henuailala e honu i di mouli balumee mo di tene. Goodou gu hai goodou gi pedi ang gi di laangi taaligi. 6Goodou gu hagi aga gu daaligi digau nadau ihala ai gi mmade, ge digaula hagalee ne hai baahi adu gi goodou.Di manawa hagakono mo talodalo
7Ogu duaahina nei, goodou gi manawa hagakono ga dae loo gi di hanimoi o Tagi. Goodou mmada gi tangada hai hadagee i dono manawa hagakono i dono talitali nia hua humalia o dana hadagee, gei e manawa hagakono i dono talitali maalia di madagoaa e doo di ua. 8Goodou gi manawa hagakono gi haga damana ina di godou hagadagadagagee, idimaa, di laangi o Tagi la gu hoohoo mai. 9Ogu duaahina nei, goodou hudee hagahuaidu ina tangada nei mo tangada nei i godou mehanga, gi dee hagi aga hua goodou go God. Goodou gi iloo bolo tangada hagi aga gu hoohoo mai dono hanimoi. 10Ogu duaahina nei, goodou gi langahia nia soukohp ala nogo hai nadau agoago i di ingoo o Tagi. Goodou gi kawe i nadau manawa hagakono mo nadau hagamahi i lodo nadau hagaduadua. 11Gidaadou e hai bolo digaula gu maluagina i nadau manawa hagakono i lodo nadau hagaduadua. Goodou gu longono di hai o Job i dono manawa hagakono, gei gu modongoohia di hai o Dimaadua dela gu hagahumalia a mee i di hagaodi gi muli, idimaa, Dimaadua e honu i di aloho mo tumaalia. c 12Ogu duaahina nei, i mua nia mee huogodoo, goodou hudee hai hagamodu ma ga hai godou hagababa. Goodou hudee hagamodu gi di langi be gi henuailala, be tei aha de hilihili. Goodou helekai hua boloo, “Uaa” maa goodou ga donu, ge “Deeai” maa goodou ga hagalee donu, gi dee too hua goodou gi lodo di hagi aga a God. d13Maa tangada i godou baahi gu manawa gee, ia gi dalodalo. Maa iai tangada e tentene, ia gi daahili hagaamu. 14Maa iai tangada i godou baahi e magi, geia gi gahia mai nia daangada mmaadua daumaha, e dalodalo, ge e hagatulu a mee gi di lolo hagalabagau i di ingoo o Tagi. e 15Talodalo dela e hai aga i lodo di hagadonu, gei tangada magi la ga hili. Tagi ga hagamaaloo aga a mee, mo di dumaalia gi ono hala. 16Malaa, goodou gi hagadau hagi aga godou huaidu mo di dalodalo i tangada nei mo tangada nei, gi maaloo goodou. Talodalo o tangada humalia la koia e mogobuna. 17Elijah tangada gadoo be gidaadou, mee ne dalodalo hagamahi bolo di ua gi hudee doo. I nia ngadau e dolu mo di baahi, gei di ua digi doo. f 18Geia ga dalodalo labelaa, gei di langi gu haga doo dana ua gi henuailala, gu haga tomo aga ana hagadili. g
19Ogu duaahina nei, maa tangada i godou baahi gu hana gee mo di tonu, goodou heia a mee gi huli hoou labelaa. 20Goodou gi langahia bolo tangada dela ma ga huli tangada huaidu gi daha mo ono hala, ia ne daa di mouli o maa gi daha mo di made, ga hidi ai di dumaalia o nia hala logowaahee. h
Copyright information for
KPG